 |
| FATHER DISNA LIKE VISITORS Maan, the young fouk mean weel Tae aa gither the gither And spen Christmas time Wi their father and mither. His that man o oor dother's Tint the bottom till's belly? Dis that quine o oor loon's Ever stop watchin telly? Fa last washed the dishes? Fa's tint the dish cloot? They're aye maakin coffee We'll seen be clean oot! Fa gid the dog turkey, An foonert the craiter? Fa beat Mither at Scrabble, 'N put her in an ill naitur? Fa's connached ma tape O the golf that I keepit, Recordin the Queen's Christmas speech On the tap o't? Fa turned ower tae Grampian? An me needin tae watch Sky. Oor gweed son his aten The hinmost mince pie. Fa's mollachin in the sit ooterie, Plunkin on the the guitar? Is the loon's quine a vegetarian? No, a vegan, that's waur. Fa's been at my choclerts? Ye're nae feart ye'll get fatter? Dinna blaad ma Glenlivet Wi Huntly tap watter! Fan wis't, did ye say, Ye waar aa gyan hame? Are you sure that your hooses Are safe sittin teem? Mither, the quine on the telly Says mair snaw's on the wye. They could aa be storm stayed here Till Hogmanay's by! |
||
| © P J Goodall | ||
 |
